Nënkryetarja e Bashkisë së Tiranës, Anisa Ruseti, ka njoftuar se aboneja për studentët do të jetë falas. Në një intervistë për “Good Morning Albanians” në “Euronews Albania”, Ruseti theksoi se aboneja do të jetë falas për 20-30 mijë studentë.
“Aboneja do të jetë falas. Nuk duhen 80 mijë abone për studentët. Një mesatare që ne kemi llogaritur është rreth 20-30 mijë abone që i duhet në muaj të sigurojë qyteti i Tiranës. Abonetë do të jenë falas, dhe ato do të jenë të lidhura të gjitha me kartën e studentit”, u shpreh më tej ajo.
Pak ditë më parë, kryebashkiaku Veliaj tha se tani që Bashkia e Tiranës mori vendimin për abonetë falas për studentët dhe subvencionimin 50% të kostos së konvikteve, studentët do e kenë shumë më të lehtë rrugën e tyre drejt dijes.
Gjatë mbledhjes së Këshillit Bashkiak të Tiranës, Veliaj deklaroi se kompensimi i biletës së abonesë së përgjithshme për studentët do të vlejë për të gjitha linjat urbane për periudhën tetor 2022 – qershor 2023. Veliaj theksoi se për ta marrë abonenë falas, studentët duhet të paraqiten në pikat ku jepen këto abone me kartën e studentit.
“Për të gjithë studentët që kanë kartë studenti, mjafton paraqitja e kartës së studentit në pikat ku japim abonetë falas. Ne duam që ata ta marrin fizikisht abonenë me kartën e studentit, që kompanitë e transportit të mos i bien me top, sepse nuk janë lekët tona, ndaj duhet t’i japim me transparencë, që të sigurohemi që çdo student që e përdor abonenë të subvencionohet, duke ia çuar ne pagesën kompanisë dhe jo studenti.
Do kërkojmë që studentët ta marrin kartën e studentit, e cila jepet falas, në të gjitha fakultetet tona, pastaj me kartën e studentit të marrin abonenë. Ne numërojmë të gjitha abonetë e dhëna dhe në fund të çdo muaji, bashkia do të bëjë rimbursimet tek kompanitë, që studentët ta kenë transportin falas”, theksoi kryebashkiaku i Tiranës.
