Policia ka zbardhur zyrtarisht shkakun e aksidentit tragjik në Berat, ku humbi jetën nëna së bashku me djalin e saj të vogël. 25-vjeçarja Klaudia Xhaferaj kishte vetëm një muaj që ishte pajisur me leje drejtimi, dhe më pas bashkëshorti i kishte dhuruar një fuoristradë tip “Mercedes Benz-ML”. Aksidenti ndodhi gjatë orëve të paradites së ditës së hënë, teksa Klaudia Xhaferaj kishte edhe djalin në makinë.
Policia ka përfunduar ekspertizën në lidhje me aksidentin tragjik të dy ditëve më parë në Berat. Mjeti në të cilën udhëtonin nëna së bashku me të birin përfundoi në lumin Osum.
Specialisti i Qarkullimit Rrugor, i cili ka edhe detyrën e OPGJ-së, Lorenc Tanushi bën me dije për “ABC” se shkaku i aksidentit ka qenë humbja e kontrollit të mjetit nga drejtuesi. Tanushi ka pohuar se humbja e kontrrollit të mjetit është shoqëruar edhe me mungesën e përvojës, pasi 25-vjeçarja kishte pak javë që kishte marrë patentën dhe ishte një drejtuese e re në timon.
“Nga studimi i të gjitha kamerave të sigurisë është vërejtur manovrimi majtas-djathtas, një karakteristikë kjo e drejtuesve të rinj, të pajisur me leje drejtimi.
Aksi Ura e Goricës-Ura e Varur është një aks problematik dhe me risk, pasi ka shumë fluks mjetesh, si pjesë kryesore e segmentit rrugor nacional Lushnje-Skrapar”, ka thënë Tanushi.
Qytetarët bënë përpjekje për t’i nxjerrë nga makina, pasi kjo e fundit përfundoi në lumë, por pa rezultat, pasi fatkeqësisht nënë e bir u mbytën.
