Ambasada e Republikës së Shqipërisë në Mbretërinë e Bashkuar, me anë të një videoje të publikuar në rrjetet sociale ka uruar dje Ditën Ndërkombëtare të gruas. Në këtë video shfaqen disa femra të suksesshme shqiptare, të cilat jetojnë në Angli, ndër to edhe Vera Ora, nëna e këngëtares shqiptare, Rita Ora.
Gjatë mesazhit të saj drejtuar nënave shqiptare, Vera ka treguar edhe për triumfin e saj në “luftën” që ka pasur me kancerin e gjirit. “Si mjeke dhe si grua, e cila ka përballuar luftën me kancerin e gjirit, u drejtohem nënave dhe vajzave shqiptare: Kujdesuni për shëndetin tuaj dhe bëjini kontrollet paraprake rregullisht”- ka bërë thirrje me anë të kësaj video Vera Ora, e njohur edhe si mjeke psikiatër.
“Sot jam e lumtur që përballova këtë sfidë dhe duke mbështetur e orientuar drejt karrierës ndërkombëtare vajzën time, Rita Ora”, pohon nëna e këngëtares më të njohur shqiptare në botë. Mesazhin e saj e përfundon me këtë fjali: “Grua shqiptare në Britani, krenohem me ty”.
Kur këngëtarja Rita Ora ishte vetëm 15 vjeç, Vera, nëna e saj, u diagnostikua me sëmundjen e kancerit të gjirit. Por, Vera u trajtua me sukses dhe ka vazhduar të jetë mbështetja kryesore e Ritas gjatë gjithë karrierës së saj.
