Zbulohet edhe identiteti i personit të dytë që policia i kërkoi ditën e sotme, të plotësonte formularin e deklarimit të pasurisë.
Bëhet fjalë për shtetasin Albert Lame ose Albert Koschiek, i cili rezulton i dënuar në Gjermani për vepra penale në fushën e narkotikëve. I njohur si udhëheqësi i ‘Bandës së bananeve’, Lame së bashku me disa shqiptarë të tjerë transportonin kokainë nga Ekuadori, në kuti bananesh për të furnizuar qytetet gjermane. Sipas Bild, Alberto Lame mbante të paktën 15 identitete të ndryshme.
Ai është gjithashtu pjesëtar i bandës së Emiljano Hysenajt, të cilit OFL-ja i dërgoi pak ditë më parë kërkesën për deklarimin e pasurisë. Më 2018 një ngarkesë 1.8 ton kokainë u kap në Gjermani e cila vinte nga Ekuadori me vlerë tregu prej 400 milionë euro. Në këtë operacion u përfshinë 500 hetues dhe forca policore gjermane për të arritur në arrestimin e 13 shqiptarëve dhe tre të huajve.
