Kryeministri i Holandës, Mark Rutte është skeptik për hapjen e negociatave të Shqipërisë me Bashkimin Evropian. Sipas tij, Shqipëria nuk është ende e gatshme të fillojë bisedimet e pranimit në BE, ndërsa shtoi se “Holanda nuk e kundërshton zgjerimin e BE-së”.
Nga Samiti i NATO-s, Rutte tha se Maqedonia Veriore është më pranë këtij qëllimi.
“Ne nuk besojmë se Shqipëria është e gatshme të fillojë bisedimet me BE në këtë pikë dhe për sa i përket Maqedonisë Veriore, ajo është më afër këtij qëllimi”, deklaroi Rutte për revistën “Pobjeda”.
I pyetur nëse 2025 është një afat realist për pranimin e një prej vendeve të Ballkanit Perëndimor në Bashkimin Europian, kryeministri i Holandës tha: “Unë nuk kam asnjë ide. Dhe ky nuk është një qëllim. Ne nuk kemi asgjë kundër zgjerimit të BE-së, por duhet të sigurohemi që të ndjekim rregullat dhe se gjithçka duhet të jetë e rreptë dhe e drejtë. Ky është gjithmonë pozicioni ynë”.
