Një zhurmë e madhe u krijua dje, pasi Berisha bënte publik mesazhin e një qytetari, ku mjeku i kishte hequr apandesitin pacientit në vend të një puçrre. Qytetari ndonëse ishte ankuar edhe në rajonin e policisë, ngjarja ishte mbajtur e fshehur, dhe sipas ish-kryeministrit Berisha, kjo ka prapavijë politike. Pas akuzës publike, një kundërpërgjigje publike ka ardhur nga vetë doktori Gazmend Xhembulla.
Mjeku, bashkëshorti i deputetes socialiste Almira Xhembulla, në një reagim në Facebook shkruan se ndaj pacientit E.S., janë zbatuar rigorozisht të gjitha rregullat dhe procedurat, sipas protokollit mjekësor në fuqi.
Më tej ai shprehet i keqardhur për akuzën nga një ish mjek dhe ish profesor i tij. Gazmend Xhembulla ndër të tjera shkruan në rrjetin social se nga dita e tij e parë si mjek, u ka shërbyer qytetarëve me profesionalizëm dhe devotshmëri, dhe se është mjaft dashakeqe lidhja që i bëhet rastit në fjalë, me punën e bashkëshortes së tij.
Po kështu ai thotë se për ti dhënë drejtim kësaj çështje, mbetet i hapur dhe i kërkon strukturave përgjegjëse që të bëjnë të gjitha verifikimet e nevojshme, për t’i shkuar deri në fund të vërtetës.
https://tiranatoday.com/skandaloze-shkon-ne-spital-per-te-hequr-nje-pucerr-mjeku-i-heq-apandesitin/
