Një sulm kibernetik goditi sistemet online të institucioneve shtetërore. Ndodhur në këto kushte, Agjencia Kombëtare e Shoqërisë së Informacionit është detyruar të mbyllë përkohësisht shërbimet publike online siç është e-Albania, por edhe faqet e tjera qeveritare ky hyn ajo e Kryeministrisë, Kuvendit, ministrive dhe institucioneve kryesore.
Eksperti i IT-së, Gentian Progni, në një intervistë në “Euronews” u shpreh se ky sulm kibernetik ndaj shërbimeve online dhe sistemeve qeveritare, jo vetëm është i mirëorganizuar, por dhe i mirë sponsorizuar.
“Mund të duhen dhe mbi 200 mijë euro që të realizohet një sulm i tillë”, tha eksperti.
Ai pohoi se sulmet kibernetike janë ndër më të vështira për t’u zbuluar. “Sulmi DDOS, teknikisht është pothuajse e pamundur ta zbulosh, për shkak se ai që sulmon, komandon disa kompjuterë të virusuar nëpër botë që të bëjnë këtë sulm dhe asnjëherë IP e tij nuk është e zbuluar”, deklaroi Progni.
Eksperti i IT-së sqaroi se është e pamundur edhe për shtete të fuqishme si Shtetet e Bashkuara të Amerikës të zbulohen të tilla sulme kibernetike, duke sjellë në vëmendje sulmin ndaj faqes së Donald Trump, ku ishte i pamundur kthimi përsëri i faqës online dhe zbulimi i autorit.
