Në ditën e nëntë të protestës së tyre, studentët braktisën ambientet e Ministrisë së Arsimit. Dhe u bashkuan përsëri të gjithë bashkë për tu drejtuar te Parlamenti.
Gjatë kohës që brenda zhvillohej seanca plenare, në ambientet e jashtme protestës iu bashkuan edhe qytetarë të thjeshtë, studentë me aftësi të kufizuara, studentë nga privati; si edhe nga qytete të ndryshme të Shqipërisë.
“Ne jemi në privat, por kemi ardhur për të mbështetur studentët. Ne kemi zgjedhur të studiojmë në privat dhe jo publik, pikërisht për këto arsye për të cilat sot po protestojmë. Kushtet janë më të mira dhe pedagogët janë më të përgatitur. Por, mbi të gjitha e kanë primare që të vijnë në mësim dhe jo si në shtet, ku shkojnë në kafe dhe mësimin e bëjnë asistentët e tyre. Në privat mund të mësosh, kurse në shtet është e pamundur.”
“Kemi ardhur më shumë se 100 veta vetëm sot nga Universiteti i Elbasanit. Edhe atje kushtet janë skandalozë, nuk ka ngrohje, tualetet janë për ibret. Ne kërkojmë vetëm të drejtat tona dhe të mundemi të arsimohemi.”
Një prind thotë për Tirana Today se studentët janë duke kërkuar të drejtat e tyre, por duhet të mendojnë edhe mundësinë e diskutimit, për t’ia arritur qëllimeve të veta.
“Po kërkove bukë, bukë do të gjesh. Por, studentët nuk mund t’i injorosh, ata duhet t’i dëgjosh. Moralisht studentët duhet të ulen me kryeministrin, sepse pa negociata dhe diskutime nuk ka të ardhme. Studentët nuk janë duke i kërkuar diçka të tepërt, hajde më rregullo shtëpinë. Po kërkojnë të drejtat e universiteteve, si u bënë universitetet private më të mira se shtetëroret?! Si u bënë vilat më të mira se shkollat?!
Studentët vazhdojnë të denoncojnë për Tirana Today gjendjen në të cilën ndodhen universitetet, kushtet e të cilave sipas tyre janë të mjerueshme.
“Unë jam student në Universitetin e Sporteve dhe atje situata nuk është aspak e mirë. Sepse ne na mungojnë kushtet minimale, nuk ka dushe. Kemi një godinë të re e cila nuk është funksionale. Ne bëjmë stërvitje në lagështirë që është jashtë çdo norme. Ndaj ne kërkojmë palestër, fushë të atletikës, futbollit çdo gjë. Universiteti i Sporteve është më problematiku në të gjithë Shqipërinë. Por, mbi të gjitha tarifat i kemi më të larta se shumë nga universitetet e tjera. Pasi veç tarifës së shkollës e cila na shkon 350 mijë lek të vjetra, ne bëjmë edhe shumë kurse të detyruara, të cilat i paguajmë nga xhepi ynë.”
Teksa ditët e fundit u fol për një përçarje të tyre, studentët sigurojnë që janë më të bashkuar. Dhe do të vazhdojnë të ushtrojnë presion për plotësimin e kërksave të tyre, si edhe paralajmërojnë vetting për pedagogët.
“Unë studioj në Universitetin e Politeknikut dhe atje ka shumë pedagogë të korruptuar. Ne do të kërkojmë ballafaqim edhe me këta profesorë që t’ia themi në sy se cilët janë të korruptuar dhe të paaftë.”
Pas qëndrimit për afro katër orë para Kuvendit, studentët iu drejtuan ambienteve të Kryeministrisë për ta vazhduar atje protestën./ TIRANA TODAY
