Kombëtarja shqiptare është duke kaluar një moment të errët, pasi nën drejtimin e Christian Panuccit rënia ka qenë e dukshme. Humbja me rezultatin e thellë 0-4 në “Loro Boriçi” ndaj Skocisë bëri që të gjithë të sulmojnë trajnerin, duke e sharë në kor edhe tifozët. Nesër në mbrëmje kuqezinjtë do të zbresin sërish në fushë për tu përballur me Uellsin në “Elbasan Arena”, një miqësore që duhet përdorur për të reflektuar.
Një rezultat pozitiv ndaj Gareth Bale me shokë, sidoqoftë, nuk mund të zhbëjë sezonin e dështuar në Ligën e Kombeve, as të ndryshojë mendimin e presidentit Armand Duka, nëse e ka vendosur “t’i japë duart” Panuccit. Veç krizës psikologjike, e cila është e qartë në kampin kuqezi, për nesër rëndojnë edhe mungesat.
Kjo, për shkak dëmtimesh. Më konkretisht, Ndoji, Binaku dhe Gjimshiti janë të lënduar dhe nuk do të jenë në dispozicion për miqësoren me Uellsin. Në këtë mënyrë, duhet riformatuar mbrojtja, sepse dy titullarë të sfidës me skocezët (Gjimshiti dhe Binaku) mungojnë.
Kuptohet, rikthehet Hysaj, që ishte i pezulluar për shkak kartonësh në humbjen 4-0, ndërkohë që mbetet të shihet nëse kjo miqësore do të jetë një mundësi për prurjet e reja, që nuk kanë pasur hapësirë deri më tani.
