Ministria për Evropën dhe Punët e Jashtme, ka kërkuar nga të gjithë shtetasit shqiptarë që jetojnë në Ukrainë, të largohen sa më parë nga vendi, për shkak të një lufte e cila është shumë pranë. Për t’u ardhur në ndihmë të gjithë shtetasve shqiptarë, janë shpërndarë edhe dy numra telefoni, që të informohen lidhur me mundësitë për t’u larguar nga vendi. SHBA e quajnë të mundur një sulm të Rusisë ndaj Ukrainës.
Rusia ka mobilizuar më shumë se 100.000 trupa pranë kufirit të saj me Ukrainën, dhe Shtetet e Bashkuara njoftuan dje se një pushtim mund të ndodhë në çdo kohë. Uashingtoni u bëri thirrje gjithashtu qytetarëve të tij që të largohen nga Ukraina sa më shpejt të jetë e mundur, siç bënë vendet e tjera, duke përfshirë Britaninë, Japoninë dhe Australinë. Moska refuzon se planifikon të pushtojë Ukrainën, duke thënë se po mbron vetëm interesat e saj të sigurisë, kundër agresionit të aleatëve të NATO-s.
“Ministria për Evropën dhe Punët e Jashtme është duke ndjekur me kujdes zhvillimet pranë kufirit ukrainas. Duke marrë parasysh rrezikun e besueshëm të përshkallëzimit të situatës, MEPJ këshillon të mos udhëtohet drejt Ukrainës. Gjithashtu, Ministria për Evropën dhe Punët e Jashtme i bën thirrje shtetasve shqiptarë që të largohen nga Ukraina sa më parë.
Qytetarët e Republikës së Shqipërisë që ndodhen në Ukrainë mund të kontaktojnë për asistencë në numrat: +48 22 824 14 27; +48 501 194 910; ose në adresat e emailit: [email protected]; [email protected] [email protected] . Qytetarët shqiptarë ftohen që të informohen përmes kanaleve të komunikimit të Ministrisë për Evropën dhe Punët e Jashtme”, thuhet në njoftimin zyrtar të Ministrisë së Jashtme.
