Zëdhënësi i Presidentit, Tedi Blushi njofton se ditën e sotme do të hidhet shorti për zgjedhjen e anëtarëve të Këshillit të ri të Emërimeve në Drejtësi.
Përmes një postimi në Facebook, Blushi bën me dije se shorti do të hidhet në Presidencë në orën 12:00 në mesditë. Ai shton se procesi do të transmetohet live në mënyrë të tillë që të sigurohet transparencë e plotë.
“Sot në ora 12:00 në Institucionin e Presidentit të Republikës hidhet shorti për zgjedhjen e anëtarëve të Këshillit të ri të Emërimeve në Drejtësi (KED)”, shkruan ai.
Meta është shprehur më herët se pas fillimit të funksionimit të KED-së së re, do ta ndjekë me shumë rigorozitet gjithë veprimtarinë e saj. Kjo sipas tij në mënyrë që të mos lejojë më asnjë devijim nga parimet dhe dispozitat kushtetuese dhe të ligjit, për të mbrojtur integritetin e mëtejshëm të gjithë procesit, për ngritjen dhe funksionimit e plotë të Gjykatës Kushtetuese.
