Ditën e sotme janë zhvilluar ndeshjet e javës së fundit të Kategorisë Superiore, ku është firmosur edhe rënia e Vllaznisë në të Parën. Nga ana tjetër Laçi dhe Luftëtari kanë siguruar Europën. E gjithë vëmendja sot ishte në dy ndeshjet më delikate të luftës për mbijetesë, Skënderbeu-Vllaznia dhe Partizani-Kamza. Dhe tashmë është zyrtare, Vllaznia ka rënë nga kategoria për të tretën herë në historinë e saj. Një ditë e zezë për futbollin shqiptar, pasi ka humbur një nga skuadrat më me histori.
Shkodranët dhanë maksimumin për të mbijetuar por ishte shumë vonë. Edhe pse arritën të mposhtin në dy javët e fundit Kukësin dhe Skënderbeun, prapë nuk mjaftoi, pasi gjithçka ishte në dorë të Kamzës e cila e zgjidhi mjaft mirë. Ndeshja e luajtur ditën e sotme në Korçë nuk kishte shumë histori. Ishin shkodranët ata që kaluan në avantazh të dyfishtë falë golave të Xhevahir Sukaj dhe Arlind Kalaja në një hark kohor brenda nëntë minutave.
Skënderbeu rihap takimin në pjesën e dytë me Gripshin por goli i Çinarit vetëm disa minuta më pas ka vulosur fitoren e miqve. Dhe dy të tjerët që pasuan të shënuar nga Malota dhe Çinari ishin më tepër gola ngushëllues ndaj një Skënderbeu të pamotivuar dhe me shumë lojtarë të stolit. Skënderbeu e mbyll kampionatin në mënyrën më të turpshme të mundshme.
Një fitore që nuk ka vlejtur për asgjë pasi Kamza ka mposhtur Partizanin në kryeqytet me rezultatin e ngushtë 1-0. Të kuqtë luajnë një ndeshje mjaft të dobët dhe pa dëshirë, duke u ndikuar edhe nga goli i shpejtë i Laçit, por fakt mbetet që nuk e kërcënuan asnjëherë portën e Kamzës në 90’ minuta lojë. Goli i vetëm i takimi është shënuar nga Rezi në minutën e 48’. Ai ishte futur në fushë vetëm tre minuta më parë, por ishte vendimtar që në fillim duke i dhuruar qëndrimin në Superiore ekipit të tij.
Ndërkohë Laçi dhe Luftëtari kanë siguruar një vend në Europë pas fitoreve ndaj Teutës dhe Lushnjes. Laçi fitoi me një rezultat të thellë 4-1, ndërsa Luftëtari 2-0 ndaj vendit të fundit.
