Sali Berisha ka hedhur akuza të forta kundrejt Lulzim Bashës, lidhur me aferën e inceneratorëve. Teksa Stela Gugallja dhe Klodian Zoto janë në kërkim ndërkombëtarë, Berisha ka hedhur “shashkën” e radhës, teksa ka zbuluar se ata janë fshehur në Lushnje, nga Basha dhe Rama në bashkëpunim.
“Zero hetim se është i zhytur si “Edvin droga” dhe “Lulzim Brava”. Janë bërë denoncime dhe Lul Brava i implikuar në këtë aferë. Lejoi që të publikohen 2 herë deklarata nga PD, nuk ka aferë më flagrante dhe vjedhje të përbashkët, e kanë mbajtur të fshehur në Lushnje kacakët Zoton dhe Gugalen, kjo aferë duhet të hetohet. Kushti i parë nga deputetë që nuk kanë asnjë lidhje me aferën, se këtu në dyja anët, “Brava” është me dy kënd, na thuaj pak udhëtimet e tij me Zoton, çfarë janë pengesat, pse nuk lejonte denoncimet dhjetëra denoncime nga aktivistë të PD-së, që të gjitha në ujdi me kreun e “Meduzës”, ku është ai Ahmetaj?”, tha Berisha.
Ende nuk ka asnjë gjurmë nga Stela Gugallja dhe Klodian Zoto të përfshirë në skemën e skandalit të inceneratorëve. Në njoftimin e SPAK thuhet se kompania “Albtek Energy” sh.p.k. (shoqëria që ka përfituar konçensionin) dhe “Integrated Technology Services” sh.p.k. (shoqëria që ka zbatuar punimet për ndërtimin e objektit të konçensionit) kanë marrë fatura dhe kanë kryer pagesa për punime që në të vërtetë nuk janë kryer nga këto shoqëri tregtare. “Albtek Energy” ka deklaruar në mënyrë fiktive 2.950.000 Euro ndërsa “Integrated Technology Services” 735.000 Euro, 3.7 milionë euro gjithsej. Sipas SPAK, shifrat e deklaruara si shpenzime dhe që janë fiktive, janë përfituar nga Lefter Koka, pra mbi 3.7 milionë euro. Këto para, Lefter Koka i ka marrë në këmbim të favorizimit të padrejtë të shoqërisë “Albtek Energy” për koncesionin.
