Ish-presidenti Bujar Nishani është shprehur se koalicioni opozitar dhe marrëveshja e firmosur ditën e sotme nuk është kundër zgjedhjeve, por për garantimin e tyre.
I ftuar në intervistën e mbrëmjes në “RTV Ora”, Nishani paralajmëroi përshkallizim të protestave dhe mosbindje civile.
“Nuk bëhet fjalë për të bllokuar zgjedhjet por për të mos lejuar një farsë elektorale. Hapi i parë ishte pikërisht ky, moslejimi i regjistrimit formal të partive opozitare për tu bërë pjesë e farsës elektorale. Momenti i dytë vijon aksioni opozitar që ka nisur prej kohësh ku aktori kryesor është populli opozitar, revolta qytetare. Ne kemi armët politike në dorë dhe armët politike do ti shfrytëzojmë.Armët politike janë fokusuar kryesisht te protestat, do të vijnë duke u përshkallëzuar në gjithë vendin. Do të ketë akte masive të mosbindjes civile të qytetarëve shqiptarë. Jam i bindur që asnjë aventurier, kushdo që të jetë ai, nuk do të ketë kurajon e motivimin për të injoruar shumicën e dërmuese të qytetarëve sot”, deklaroi Nishani.
Teksa po komentonte deklaratën e kryeministrit Rama, ku e cilësoi bojkotin e zgjedhjeve nga opozita një vetëvrasje politike, Nishani tha se kryeministri nuk është konsekuent në qëndrimet e tij politike.
“Është një Kryeministër që asnjëherë nuk ka qenë konsekuent në qëndrimet e tij politike dhe jam i bindur që përballë presionit popullor, kjo është një betejë politike jo betejë në luftë, por nëse e shohim në retrospektivë asnjëherë drejtuesit dhe pushtetarët autoritarë nuk kanë triumfuar dot përballë masës së madhe”, tha Nishani.
