Ditën e nesërme, më 2 mars pritet të zgjidhet kryetari i ri i Komunitetit Mysliman të Shqipërisë. Pak më parë u mbajt edhe mbledhja e Kryesisë, e cila zyrtarizoi edhe kandidaturat. Por, teksa kandidatura e kryetarit aktual Skënder Bruçaj ishte e pritshme, ky i fundit është larguar nga gara një ditë para mbajtjes së zgjedhjeve. Në një lidhje telefonike për Ora News, myftiu i Tiranës Ylli Gurra ka komentuar këtë vendim të Bruçajt si dhe ka konfirmuar kandidaturën e vetë në zgjedhjet e nesërme.
“Nuk kam si të di arsyet e Bruçajt nga tërheqja, ju falënderoj që më dhatë mundësi përmes jush të konfirmoj kandidimin, KMSH është organizmi kombëtar dhe duhet të jetë i pavarur. KMSH është i shqiptarëve dhe për shqiptarët prandaj jam në garë me të gjithë transparencën time dhe kërkoj dhe nga ju që të përcillni live zgjedhjet.”
Myftiu i Tiranës Gurra u shpreh pas mbledhjes se kishte kërkuar shtyrjen e zgjedhjeve, në mënyrë që të ketë më shumë afat për njohjen e programit të secilit kandidat. Si edhe ai bën thirrje për prezencën e mediave ditën e nesërme gjatë zgjedhjeve. Duke këmbëngulur për të pasur transparencë dhe kthjelltësi.
Në garë për kreun e Komunitetit Mysliman Shqiptar janë Islam Hoxha, kryetar i këshillit të përgjithshëm të KMSH, Bujar Spahiu, nënkryetar i KMSH, Ylli Gurra, myfti i Tiranës dhe Gramos Blliku, myftiu i Lushnjes. Kjo pasi imami i Golemit, Gëzim Abdishahu nuk plotësonte kushtet për të qenë kandidat në zgjedhje. Mbledhja e Këshillit të Përgjithshëm do të mbahet në ambientet e Medresesë së Tiranës në orën 10:30.
