Për botuesin Fahri Balliu, kryeministri Edi Rama nuk do arrijë të fitojë një mandat të tretë, pasi nuk ka se çfarë t’u ofrojë shqiptarëve.
Duke u ndalur te darka e delegacionit shqiptar në Dubai, e cila u komentua në rrjetet sociale, Balliu tha se aty ndodheshin 28 persona dhe njerëz të medias.
Madje sipas tij, Rama ka konsumua një shishe verë në Francë e cila kushtonte 18 mijë euro.
Pjesë nga deklarata e Balliut në “News24”:
Fushata ka filluar, ka parti dhe forca politike me forma të ndryshme të punës. Po të shikosh LSI-në është në terren kryetarja. Vë re që kryeministri dhe PS respekton atë stilin e heshtjes dhe të punëve të nëndheshme, që një pjesë e madhe janë të dënueshme. Unë them që Shqipëria është në fushatë.
Qeveria ka një besim të madh që Rama do t’ia hedhi edhe këtë herë, nuk thotë do t’ia fitojë. Kjo varet nga kokëfortësia e fakteve dhe lufta e opozitës, nëse do t’ia hedhë apo jo edhe këtë herë. Unë gjykoj që ky konsideron qeverisje daljet në televizor. Ky e çoi tepsinë në Dubai. Me ato lekë që kanë këta shkojnë në Dubai apo ku të duan. Çështja s’është aty, por te mënyra si vajtën.
Delegacioni në Dubai ishte i përbërë prej 28 personash. Ka patur edhe njerëz të medias që këta s’i thonë. Ka qenë edhe kryeministri në Francë me 18 mijë euro shishja. Rama është pa ofertë në këto zgjedhje. Oferta e Ramës është anti elektorale, anti-njerëzore, anti-shqiptare.
