Në Angli të gjithë e duan Elseid Hysaj. Tashmë në garë është futur edhe Tottenham i cili ka vuajtur për një mbrojtës të krahut të djathtë që pas largimit të Kyle Walker drejt Manchester City. Pozicion i cili nuk u mbulua as nga Trippier dhe as nga Serge Aurier, për këtë arsye drejtuesit londinez kanë shënjestruar mbrojtësin e përfaqësueses shqiptare, Elseid Hysajn. Mediat angleze raportojnë se edhe trajneri Mauricio Pochetino ka dhënë “ok” e tij për startin e negociatave.
Përfaqësuesi i 24-vjeçarit, Mario Giufreddi gjatë muajit prill ndodhej në Angli për të diskutuar një transferim të mundshëm tek Chelsea ose Liverpooli, megjithatë Tottenhami duket më i interesuar për shërbimet e Hysajt.
Futbollisti i kombëtares kuqezi ka një klauzolë prej 50 milion eurosh në kontratën e tij aktuale me Napolin e cila përfundon në vitin 2021. Shkarkimi i Maurizzio Sarrit i cili ishte njeriu që e afroi Hysajn tek klubi i kaltër ka bërë që mbrojtësi të vendosë në diskutim të ardhmen e tij tek Napoli dhe Premier League ka qenë gjithnjë një objektiv për shkodranin. Nëse Sarri emërohet trajner i Chelsea-it atëherë blutë do të kishin avantazh në preferencat e Elseid Hysajt.
