Në balotazh janë 21 komuna, përfshirë dhe Prishtinën. Në të gjitha këto komuna në zgjedhjet e 17 tetorit, asnjë kandidatë nuk mori më shumë se 50% të votave të nevojshme për t’u shpallur fitues. Sipas ligjit për zgjedhjet lokale dhe sistemit të aplikuar zgjedhor, postin e kryetarit të komunës e siguron në raundin e parë kandidati që merr 50 për qind plus një votë, ndërsa nëse kjo nuk arrihet, atëherë organizohet raundi i dytë ndërmjet dy kandidatëve që kanë fituar më së shumti vota.
Të drejtë vote kësaj radhe kanë 1,260,571 qytetarë, dhe procesi i votimit do të mbahet në 66% të vendvotimeve apo në 1,638 nga 2,477.
Edhe raundi i dytë i zgjedhjeve po monitorohet nga vazhgues të Bashkimit Evropian. Ky mision raundin e parë të zgjedhjeve lokale të 17 tetorit e vlerësoi si zgjedhje të organizuara mirë dhe pa probleme të mëdha, përjashtuar këtu komunat me shumicë serbe. Kësaj radhe votohet vetëm në një komunë me shumicë serbe Kllokot.
Në zgjedhjet lokale të 17 tetorit pjesëmarrja në votime për të zgjedhur kryetarët e rinj të komunave dhe asambletë komunale në 38 komunat e Kosovës ishte rreth 43%.
Në 17 komuna, tashmë ka kryetarë të zgjedhur, ndonëse akoma nuk është çertifikuar rezultati i zgjedhjeve, ndërsa, 21 komuna tashmë garojnë nga dy kandidatë. /DW
