Një ngjarje e rëndë ndodhi mëngjesin e sotëm në qytetin e Shkodrës, ku ka mbetur i vrarë Nazmi Bandula. 55-vjeçari ndodhej në një lokal afër banesës së tij, në momentin kur ka ndodhur ekzekutimi.
Nga hetimet paraprake, dyshohet se Bandula është qëlluar me breshëri plumbash nga një makinë. Më pas ekzekutorët janë larguar në drejtim të paditur.
55-vjeçari nuk ishte një emër i panjohur për policinë. Bandula ishte një person me precedent të mëparshme penal, për konflikte brenda familjes. Në 2012 ishte arrestuar pas një konflikti pronësie me vëllanë e tij, të cilit e kishte kërcënuar me armë. Po kështu, më 26 dhjetor 2020, një sasi tritoli i ishte vënë mjetit tip fouristradë X5 të Bandulës që ishte parkuar pranë shtëpisë së tij. Nga shpërthimi nuk pati të lënduar. Vetë Bandula tha për ngjarjen në atë kohë se nuk e kishte idenë se kush ia kishte vendosur tritolin, pasi nuk kishte konflikte.
Shërbimet e policisë kanë rrethuar zonën dhe vijon krehja e saj, me qëllim kapjen e autorit. Grupi hetimor ndodhet në vendngjarje, dhe nën drejtimin e Prokurorisë vijon punën për sqarimin e plotë të rrethanave të ngjarjes.
