Të udhëtosh botën është një ëndërr e shumë prej nesh, por kjo varet edhe nga kombësia e një personi. Disa janë me shumë fat, e ka të tjerë, si ne shqiptarët, që ëndërrojmë të jemi pjesë e BE-së pikërisht për të lëvizur të lirë.
Një raport i publikuar së fundmi, në shkurt të 2018-ës, tregon se cilat pasaporta janë më të fuqishme në botë. Sipas tij, janë vetëm 2 shtete, qytetarët e të cilëve mund të lëvizin lirshëm në plot 180 destinacione në mbarë botën, dhe janë të dy në Azi.
Japonia dhe Singapori kanë tashmë pasaportat më të fuqishme në botë, sipas raportit të publikuar nga Henley Passport Index.
Pas tyre, renditet Gjermania, me mundësinë e udhëtimit pa viza në plot 179 shtete.
Ky ndryshim renditjeje vjen si pasojë e heqjes së vizave nga Uzbekistani për shtetasit japonezë dhe të Singaporit në fillim të shkurtit. Paraguai gjithashtu hoqi vizat për mbajtësit e pasaportave të Singaporit.
Rritja e indeksit të shteteve të pasura aziatike është vonuar shumë, argumenton Parag Khanna, bashkëpunëtor i lartë në Qendrën për Azinë dhe Globalizimin në Universitetin Kombëtar të Singaporit.
“Këto dy shtete në veçanti janë identifikuar si fuqi komerciale paqësore, me qytetarët e tyre të interesuar kryesisht në aktivitetet e biznesit dhe investimeve”, thotë Khanna në një deklaratë.
Në vendin e tretë renditet Korea e Jugut, krahas vendeve europiane, si Danimarka, Finlanda, Franca, Italia, Spanja dhe Suedia. Këta shtetas mund të udhëtojnë pa viza në 178 destinacione.
Emiratet e Bashkuara Arabe janë historia më e madhe e dekadës kur bëhet fjalë për lirinë e udhëtimit. Është rritur me plot 34 pozicione në 10 vitet e fundit – 11 vende vetëm në vitin e kaluar pas marrëveshjes për hyrje të lirë në Kinë dhe Irlandë në 2017.
RENDITJA E PASAPORTAVE MË TË FUQISHME:
- Japonia, Singapori: 180
- Gjermania: 179
- Danimarka, Finlanda, Franca, Italia, Suedia, Spanja, Korea e Jugut: 178
- Norvegjia, Mbretëria e Bashkuar, Austria, Luksemburgu, Hollanda, Portugalia: 177
- Zvicra, Irlanda, SHBA, Kanada: 176
- Belgjikë, Australia, Greqia: 174
- Zelanda e Re, Republika Çeke, Malta: 173
- Islanda: 172
- Hungaria: 171
- Latvia: 170
Shtetet e fundit janë Afganistani me 24 vende ku mund të udhëtojë pa viza, Iraku me 27, Siria me 28, Pakistani me 30 dhe Somalia me 32.
Ndërkohë, Shqipëria renditet në vendin e 54-t me liri të lëvizjes në 100 shtete. TIRANA TODAY
