Kokrrat e polenit nga bimët që lulëzojnë, fluturojnë zakonisht edhe qindra kilometra përmes erë. Tani duket se kriza e klimës e ka përshpejtuar udhëtimin e tyre, duke bërë që sezon i alergjive në disa zona të botës të nisë më herët, të zgjasë më shumë, dhe të bëhet nga viti në vit më i ashpër.
Në 3 dekadat e fundit, shkencëtarët kanë vërejtur se temperaturat më të ngrohta nga ndryshimi i klimës, kanë bërë që sezoni i polenit në Amerikën e Veriut të zgjatet me 20 ditë në vit. Njëkohësisht, nivele më të larta të dyoksidit të karbonit (CO2), nënkuptojnë prodhimin e një sasie më të madhe poleni në pranverë.
Tendenca të ngjashme janë vënë re edhe në Evropë. Kjo rritje e sasisë së polenit në ajër, po i përkeqëson të gjitha llojet e problemeve të frymëmarrjes për ata që janë alergjikë. Por nga ana tjetër, ka edhe një fenomen tjetër që shpesh neglizhohet.
Një studim i ri në juglindje të Gjermanisë, ka zbuluar se mënyra e transportimit të polenit në një botë që po ngrohet, po ndryshon gjithashtu sipas modeleve të motit dhe qarkullimit atmosferik, duke e përhapur potencialisht polenin në zona të reja, dhe duke i ekspozuar njerëzit ndaj alergjenëve të ndryshëm, ndaj të cilëve sistemet e tyre imunitare nuk janë të përgatitura.
Studimi i fokusuar në landin e Bavarisë në Gjermani, përdori 6 stacione të monitorimit të nivelit të polenit në rajon, duke ndjekur 7 lulëzimin e 7 lloje bimësh. Gjatë viteve 1987-2017, autorët zbuluan se specie të caktuara, si shkurret e lajthisë dhe pemët e alderit, e kanë zgjatur deri në 2 ditë në vit sezonin e tyre të lulëzimit, duke e shtuar deri në 60 ditë sezonin e polenit në Bavari gjatë kësaj periudhë.
Dhe fakti më i habitshëm, ishte se shumica e polenit nuk ishte vendas. Në stacionet e monitorimit alpin, 75 për qind e specieve të polenit ishin me origjinë nga jashtë Bavarisë. Në stacionet pjesës së ultësirës bavareze, 63 për qind e poleneve kishin lidhje me burime jo-lokale të polenit, dhe kjo ishte e vërtetë edhe në sezonin kryesor të polenit në Bavari.
Gjetjet e këtij studimi, përputhen edhe me një studim tjetër të kohëve të fundit, që u zhvillua në të gjithë Evropën, dhe që zbuloi se vetëm transporti i polenit përbën deri në 20 për qind të ndryshimeve të fundit në polenin e barit, dhe deri në 40 për qind të ndryshimeve në polenin e shkurreve.
“Transporti i polenit ka pasoja të rëndësishme për kohëzgjatjen dhe ashpërsinë e sezonit alergjik të polenit”-thotë eko-klimatologu Ji Juan nga Universiteti Teknik i Mynihut. Tashmë, alergjitë e polenit ndikojnë deri në 40 për qind të popullsisë në Evropën Veriore, dhe studimet e fundit sugjerojnë se përqendrimet më të larta të polenit, sezonet më të gjata dhe përhapja e poleneve në zona të reja, mund ta përkeqësojnë akoma më shumë stinën e alergjive.
Burimi i lajmit: https://www.sciencealert.com/climate-change-is-exposing-people-to-new-pollens-and-longer-allergy-seasons
Përshtatur nga TIRANA TODAY
