Të gjithë tifozët e futbollist ishin duke pritur se si do të ishte debutimi i Cristiano Ronaldos në Champions League me fanellën e Juventusit. Po ajo që ndodhi në fushë nuk e kishte parashikuar askush, portugezi u ndëshkua me karton të kuq në minutën e 29’.
E gjithë situata ishte e çuditshme, pasi sipas specialistëve në një situatë të tillë maksimumi që mund të ndëshkohet një futbollist është kartoni i verdhë. Ronaldo shpërtheu në lot, ndërkohë që pas këtij rasti, shtohen dyshimet se UEFA është e “kapur” nga Real Madrid dhe Barcelona.
Një ditë para kësaj ndeshje, presidenti i Juventusit, Andrea Agnelli, deklaronte se klubi nga Torino ka në plan të bëhet numri një në botë. Por duket se nuk i kanë bërë mirë llogaritë me UEFA-n, e cila brenda një kohe të shkurtër, ka ndëshkuar lojtarin më të mirë në botë, në mënyrë të pashpjegueshme.
Fillimisht Cristiano Ronaldo, edhe pse shënoi 15 gola në Champions League, si askush tjetër më parë, nuk u përzgjodh lojtari më i mirë. Në vend të tij u zgjodh mesfushori i Real Madrid, Luka Modriç, që nuk është se kishte bërë ndonjë sezon mbresëlënës në Champions dhe kampionatin spanjoll (Botërori nuk kishte lidhje me çmimin).
Më pas erdhi ndëshkimi i çuditshëm i mbrëmjes së djeshme. Shumë analistë shprehen se këto që po i ndodhin Ronaldos, janë një “ndëshkim” pse vendosi të largohet nga Reali. Për këtë argument u pyet edhe trajneri i Juventusit, Allegri, por ai preferoi t’i shmangej.
Allegri thjesht kërkoi që në Champions të vendoset VAR, kërkesë që në mënyrë të pashpjegueshme UEFA nuk e pranon, edhe pse rezultatet e teknologjisë në Botëror ishin mbresëlënëse. Thuhet se pas refuzimit të UEFA-s qëndrojnë pikërisht dy klubet e Spanjës, Real Madrid e Barcelona, që vitet e fundit janë favorizuar nga “gabime” skandaloze të gjyqtarëve.
