Një nga ata që la Tiranën për Skënderbeun në verë ishte Asion Daja. Mesfushori i korçarëve që më parë ka veshur fanellën bardheblu, të Partizanit dhe Dinamos për “Panorama Sport” rrëfen ditët në shtëpi. Thotë se është i kondicionuar për stërvitjen, ndërsa këto kohë ka edhe një detyrë shtesë. Pazarit për familjen.
Ditë të vështira për të gjithë. Është e vështirë të qëndrosh në shtëpi?
Ne futbollistët s’para jemi mësuar të rrimë në shtëpi. Kemi një program javor që e përfundojmë në fundjavë me ndeshjet, dhe këto ditë në shtëpi na duken të gjitha njësoj. Ama po mundohemi të bëjmë pak stërvitje në kushte shtëpie dhe kam përgjegjësi në shtëpi që të bëj pazarin.
Si ja bëni me stërvitjen, dhe çthonë drejtuesit e skuadrës për gjendjen?
Nuk kemi pasur komunikim me drejtuesit përveç stafit teknik. Me ta jemi në komunikim të vazhdueshem në grupin e “WhatsApp”-it po ashtu dhe të gjithë futbollistët. Stërvitja është e reduktuar shumë në kushte shtëpie, por sa për të mbajtur formën që mos ta fillojmë nga zero, me shpresë që do të nisë gjithçka sa më shpejt.
Mund të jeni gati për një kohë të shkurtër për të qenë në fushën e lojës?
Sa kohë nuk e di me saktësi, por minimumi mendoj 2 javë dhe përgatitjet besoj do të jenë më specifike, pasi do të kemi pak ndeshje në krahasim me përgatitjet e fillimsezonit. Gjithsesi, këto gjëra i takojnë stafit teknik.
Ka shumë ide për kampionatin, ju për cilin opsion jeni?
Sa për idetë e mbylljes së kampionatit, mendoj se ndeshjet duhet të luhen. Çdo ekip ka shumë për të dhënë deri në fund të ndeshjeve. Shpresoj që të fillojë sa më shpejt. Duhet ta pranoj se më vjen keq që u mbyll në një moment ku Skënderbeu ishte në një formë të mirë. Kishte krijuar një harmoni nëpërmjet lojtarëve. Skënderbeu do të jetë në 3 vendet e para në fund të sezonit. /PANORAMASPORT.AL
