Federata Shqiptare e Futbollit njoftoi daljen në shitje të biletave për ndeshjen e 2 shtatorit me Lihtenshtejnin, e para për trajnerin italian në drejtimin e kuqezinjve, duke bërë të ditur bashkë me çmimet edhe një strategji interesante të promovimit të tyre. Kështu pikë se parë biletat që mund të gjenden online në faqen e autorizuar bileta.fshf.org ose edhe në dyqanin zyrtar të Federatës në Rrugën e Elbasanit për javën e parë të shitjes do të jenë me 20 % zbritja, çka do të thotë se deri në 14 gusht mund t’i merrni me këto çmime.
Gjithashtu për herë të parë tifozët të mund të blejnë një biletë dyshe, pra bashkë me atë për ndeshjen ndaj Lihtenshtejnit të pajisen me një biletë edhe për takimin e shumëpritur me Italinë që do të luhet në Shkodër. Në këtë ndeshje mendohet të ketë një bum kërkesash për sa i përket prezencës për përballjen e kuqezinjve me të kaltrit 4 herë Kampionë të Botës.
Federata Shqiptare e Futbollit ka vendosur që çdo tifoz që merr një biletë për takimin me Lihtenshtejnin mund të blejë në dyqanin zyrtar të Federatës me 50 % ulje.
Pavarësisht etiketimit si një rival modest Lihtenshtejni ofron një provë të rëndësishme për kombëtaren shqiptare që i duhet ta nisë me këmbën e mbarë aventurën me trajnerin e ri Panucci duke krijuar premisat e duhura për takimet e radhës, sidomos atë që do të luhet në 5 shtator kundër Maqedonisë.
Çmimet:
Tribuna B3 =8.000 lekë
Tribuna B2 + B4=6.400 lekë
Tribuna A1 + A4=6.400 lekë
Tribuna B1 + B5=4.800 lekë
Tribuna E=2.400 lekë
Tribuna D=1.600 lekë
Tribuna G1=1.200 lekë
Tribuna G2=800 lekë
