Pas ndërprerjes së sinjalit nga seanca plenare në Kuvend për televizionet, ka reaguar drejtori i RTSH Thoma Gëllçi. Ky i fundit, i kontaktuar nga newsbomb.al tha se nuk ka asnjë bllokim sinjali dhe se televizionet janë njoftuar një javë më parë përmes një shkrese zyrtare lidhur me këtë çështje.
Gëllçi thotë se televizionet private duhet të lidhin kontratë për të ndarë kostot teknike, përndryshe t’i transmetojnë seancat me logon e RTSH Kuvend:
“S’ka asnjë bllokim sinjali, u kemi kërkuar televizioneve private të lidhim kontratë e të ndajmë kostot teknike ose nëse e duan pa lekë, atëherë të transmetojnë pamjet me logon e RTSH Kuvend. Nëse e duan pa logo atëherë le të vijnë të lidhin kontratë, të ndajmë kostot e prodhimit e të kenë sinjal të pastër e të qartë”.
TVSH vendosi të mos lejojë transmetimin e sinjalit të punimeve të seancës, duke mos lejuar kështu asnjë televizion tjetër të japë pamjet nga seanca e kësaj së enjteje. Por pas shumë reagimeve, TVSH lejoi marrjen e sinjalit nga televizionet e tjera.
