Bashkia e Tiranës i ka akorduar sot titullin “simbol i qytetit të Tiranës”, pas vdekjes, futbollistit të njohur të kombëtares shqiptare Panajot Pano.
Titulli iu dorëzua sot në një ceremoni të veçantë, bashkëshortes së Panajot Panos, dhe të birit, Ledio Pano, i cili ndoqi rrugën e të atit për të lënë edhe ai gjurmën e tij në futbollin shqiptar.
“Në nderim të veprimtarisë dhe përkushtimit që ka dëshmuar për zhvillimin e sportit në vendin tonë dhe njohjes së tij edhe në aktivitete ndërkombëtare dhe botërore. Në respekt të vlerave që i përcolli brezave dhe pasionit që ngjalli dhe rriti për futbollin”, theksohet në vendimin e Bashkisë së Tiranës.
Kush ishte Panajot Pano?
Panajot Pano lindi më 7 Mars në vitin 1939 në Durrës.
Ai e filloi karrierën e tij sportive me 12 vjeç në skuadrën e të rinjve të SK Tirana si portier. Më vonë në vitin 1959 pasi emërohet në ushtri luan për skuadrën e KF Partizani si sulmues. Me këtë lojtar në gjirin e tij KF Partizani fiton katër herë kampionatin kombëtar dhe pesë herë kupën e Republikës.
Panajot Pano luajti 25 herë për skuadrën kombëtare. Në vitin 1970 skuadra kombëtare fiton kupën e Ballkanit. Mbas vitit 1975 ai stërviti si trajner ekipin kombëtar dhe atë të të rinjve të KF Partizani.
I pajisur me një teknikë të përsosur driblimi, ai ishte një nga lojtarët më të mirë të kombëtares së futbollit. Në vitin 2003 me rastin e jubileut të UEFA-s u zgjodh si lojtari më i mirë i të gjitha kohërave nga Federata Shqiptare e Futbollit.
Më 27 prill të vitit 2005 mori titullin “Mjeshtër i Madh i Punës”, akorduar nga Presidenti i Republikës Alfred Moisiu. Gjithashtu, në mars të vitit 2009, u dekorua me titullin “Nderi i Kombit” nga Presidenti i Republikës, Bamir Topi.
Panajot Pano ndërroi jetë më 19 janar të vitit 2010 në Jacksonville, Florida, të Shteteve të Bashkuara të Amerikës, si pasojë e një ataku kardiak.
