Gjykata e Tiranës ka caktuar masën e sigurisë “arrest me burg” për efektivin e policisë bashkiake, Saimir Muzikanti dhe efektivin e Patrullës së Përgjithshme, Serxhio Cani. Dy efektivët e arrestuar akuzohen për grabitjen e qytetarëve në liqenin Artificial të Tiranës.
Ata u vinin prangat të rinjve që i kapnin duke konsumuar hashash në zonën e Liqenit, dhe i linin të lirë pasi u jepnin nga 20 mijë deri në 50 mijë lekë të vjetra.
Cani, 23 vjeç dhe Muzikanti, 39 vjeç, u arrestuan nga Policia dhe Agjencia e Mbikëqyrjes Policore për vjedhje. Arrestimi i dy punonjësve të Policisë erdhi pas kallëzimit të dy qytetarëve, të cilët pretendonin se efektivët pas kontrollit i kishin marrë vlera monetare, duke i thënë se ndryshe do i shoqëronin në komisariat.
Cani dhe Muzikanti gjurmonin persona të cilët konsumonin kanabis nga zona e Liqenit Artificial, por edhe qytetarë të cilët ishin veshur mirë. Pasi i afroheshin me pretendimin se në kuadër të punës duhet t’i bënin kontrolle, ata i merrnin vlerat monetare që i gjenin në xhep dhe më pas largoheshin.
