Dy shqiptarë dhe një tunizian kanë rënë në pranga të policisë në Itali, pasi janë kapur me 1 kilogram heroinë të pastër, e cila ishte e ndarë me doza dhe arrinte vlerën e rreth 14 mijë euro, thotë policia Mestre.
Të arrestuarit janë Olgert Shati dhe Sokol Bezhani, të dy 25 vjeç dhe një tunizian, Tababi Aboutaleb, 23-vjeç. Tre të rinjtë kishin rënë në sy për sjellje të dyshimtë dhe karabinierët vendosën t’i mbanin nën vëzhgim e t’i ndiqnin.
Skena e shitjes së drogës u zhvillua para syve të dy karabinierëve të veshur civilë. Dy makina ndaluan pranë njëra-tjetrës në rrugë dhe prej tyre dolën tre persona.
U vërtetua që tuniziani po dorëzonte 3500 euro pará në dorë, tashmë të sekuestruara. Në makinën e shqiptarëve u gjetën 2 mijë euro në kartëmonedha në prerje të vogël, me sa duket nga shitje të realizuara së fundmi. Sipas karabinierëve, heroina duhej të shitej 7 mijë euro, kështu që shifra e dorëzuar nga tuniziani ka qenë vetëm një pjesë e pagesës. Në treg vlera shkon 14-15 euro grami, e shitur në doza sasia e heroinës do të shkonte rreth 14 mijë euro.
Tre të rinjtë janë dërguar në burgun e Venecias, ndërsa një femër 26 –vjeçare që ishte në makinë do të hetohet në gjendje të lirë për zotërim lëndësh narkotike./Tirana Today/
