Ujësjellësi i Tiranës do të ndahet në tre shoqëri të reja, pas miratimit të ndarjeve të aksioneve nga Asambleja e Aksionerëve të Ujësjellës-Kanalizime Tiranë.
Në mbledhjen e datës 27 shtator u dakordësua krijimi i shoqërisë Ujësjellës Kanalizime Bashkia Tiranë, me një kapital prej 18.1 miliard lekë.
Po ashtu, u vendos krijimi i shoqërisë Ujësjellës Kanalizime Bashkia Kamëz me kapital 289 milion lekë dhe ujësjellësi i Bashkisë Vorë, me kapital prej 81 milion lekë.
Pas ndarjes, Ujësjellësi i Tiranës do të furnizojë me ujë me shumicë Kamzën dhe Vorën, me kontrata të reja furnizimi, ndërsa pas formalizimit të ndarjes, shoqëritë e krijuara do të aplikojnë për licencë pranë Komisionit Kombëtar Rregullator të Ujit.
Secila prej kompanive do të ketë të drejtën e propozimit të tarifave të reja për zonën ku do të ushtrojë juridiksionin. Kështu, me hyrjen në fuqi të marrëveshjes nuk përjashtohet mundësia e ndryshimit të tarifave në këto bashki.
Aktualisht, Bashkia e Tiranës ka aplikuar për një rritje të çmimit pranë Entit Rregullator të Ujit, ndërkohë që është ky i fundit që do të marrë vendimin përfundimtar.
