Fiorentina ka zhvilluar një ndeshje të madhe përballë Napolit në Firence, duke i hequr shpresat për të fituar titullin kampion pasi e mposhti 3-0. Kjo ishte një fitore nga e cila ka festuar Juventusi, e cila tashmë shkon e qetë në ndeshjet e radhës dhe pret kurorëzimin kampion i Italisë.
Heroi i një jave më parë në ndeshjen me Juven, Kalidou Koulibaly e “tradhtoi” Napolin që në minutën e 9’, pasi u ndëshkua me karton të kuq duke i lënë miqtë me dhjetë futbollistë praktikisht për të gjithë ndeshjen.
Napoli dukej shumë i lodhur dhe nuk kishte fuqinë të krijonte dhe të godiste në portën e Fiorentinës, duke parë edhe statistikat vetëm një goditje në portën e vjolave në pjesën e parë. Ndërsa vendasit në minutën e 34’ me Simeonen zhbllokojnë rezultatin.
Djali i trajnerit të Atletico, Diego Simeone, shënoi edhe golin e dytë për “vjollcat”, kur u mbush një orë lojë, duke mbyllur llogaritë e ndeshjes dhe ndoshta të gjithë kampionatit.
Në kohën shtesë ai bëhet sërish protagonist duke shënuar edhe golin e tretë personal dhe për Fiorentinën. Ky ishte goli i 13-të për të në këtë sezon.
Napoli nuk mundi të reagojë dhe pas kësaj humbje do të ketë nevojë për një mrekulli të vërtetë sportive, ndërsa Fiorentina mbetet në garë për një vend në Europa League, pasi Milan i vendit të shtatë është vetëm tre pikë larg.
