Merkato e Napolit tashmë ka filluar dhe ditën e sotme blerja e parë ka kryer testet mjekësore. Bëhet fjalë për Giovanni Di Lorenzo, i cili luan në rolin e mbrojtësit të djathtë.
26 vjeçari Di Lorenzo, mbrojtës i djathtë, vjen nga një sezon i shkëlqyer, edhe pse skuadra e tij ra në Serinë B. Di Lorenzo luajti 37 ndeshje të plota (vetëm 1 më pak se rekordmeni Caputo), shënoi 5 gola e dha 3 asiste, ndërsa e mbylli me vetëm 8 kartonë të verdhë.
Në këtë mënyrë, klubi jugor po vë në jetë atë që paralajmëroi presidenti Aurelio De Laurentiis para pak ditësh: këtë verë Napoli do të përforcojë krahët e mbrojtjes dhe do të shesë disa lojtarë mes të cilëve Hysaj.
Napoli do të paguajë 8 milionë euro për pasardhësin e Elseid Hysajt, plus 1 milion euro bonus. Di Lorenzo i pëlqente shumë edhe Atletico Madridit, që ndoshta tani do të kthejë sytë përfundimisht nga Hysaj, i cili në verë do të largohet nga Napoli, diçka e pranuar edhe nga agjenti i tij të mërkurën.
