Napoli me golin e shënuar në minutën e fundit me anë të qendërmbrojtësi Kalidou Koulibaly i ka dhënë Napolit një fitore të jashtëzakonshme, 1-0 në fushën e Juventus dhe praktikisht ka hapur kampionatin italian. Kjo bën që napolitanët të besojnë tek mrekullia, pasi Juventus ka para ndeshje mjaft të vështira duke filluar nga kjo javë në “San Siro” përballë Interit e në fund në transfertë me Romën.
Pjesa e parë u dominua nga djemtë e Sarrit të cilët kërkuan me çdo kusht golin, ndërsa Juventus më shumë u mbrojt dhe ajo që arriti ishte vetëm një shtyllë e Miralem Pjanic. Qendërsulmuesi Gonzalo Higuain, e preku shumë pak topin në këtë takim dhe nuk arriti asnjëherë të ishte i rrezikshëm përballë Reinës.
Nga ana tjetër, Napoli e kontrolli topin më shumë, por pati vetëm një rast kur kapiteni Marek Hamsik goditi jashtë kuadratit nga një pozicion i favorshëm me portën. Në 45 minutat e dyta tabloja ishte e njëjtë dhe ndeshja nuk pati spektakël, Gianluigi Buffon bëri një pritje të rëndësishme ndaj tentativës së Jose Callejon, por kjo ishte shumë pak për të cenuar vendasit.
Por pikërisht kur gjithçka po i drejtohej barazimit, qendërmbrojtësi Koulibaly kërceu më lart se të gjithë gjatë një goditje nga këndi dhe mposhti Gianluigi Buffon, duke i dhënë fitoren e jashtëzakonshme skuadrës së Napoli.
