Kreu i opozitës, Lulzim Basha ka reaguar në lidhje me ndarjen nga jeta të aktorit të njohur të humorit, Gëzim Kruja.
Përmes një postimi në Facebook, Basha i shpreh ngushëllimet familjes së të ndjerit, teksa thotë se njerëz si “ai mbesin përjetë mes nesh me dhuntinë për të na vënë buzagaz e për të parë më të mirën edhe në kohë vështirësish e sprovash”.
Kujtojmë se gjendja e aktorit ka qenë e rënduar, ndërsa kohët e fundit e kishte të pamundur të fliste për shkak të sëmundjes. Dalja e tij e fundit për mediat ishte në festën e 80-vjetorit të lindjes, në dhjetor të vitit të kaluar. Vepra e fundit që ngjiti në skenë Gëzim Krujën ishte në vitin 2018.
Postimi i plotë:
Me hidhërim mësova lajmin e ndarjes nga jeta të Gëzim Krujës, artistit të madh shkodran të humorit që na fali buzëqeshje në ditë të vështira, e sot me dhimbje duhet ti themi lamtumirë.
Njerëz si ai mbesin përjetë mes nesh me dhuntinë për të na vënë buzagaz e për të parë më të mirën edhe në kohë vështirësish e sprovash.
Ngushëllime familjes Kruja, miqve dhe kolegëve të tij artistë. U prehtë në paqe!
