Eric Clapton nuk do të luajë në klabe dhe salla koncertesh ku kërkohet vaksinimi anti-Covid: kjo u njoftua nga vetë kitaristi, në vijim të direktivave të kryeministrit britanik Boris Johnson, sipas së cilave do të kërkohet paraqitja e ‘pasaportës së gjelbër’ në të gjitha klabet dhe vendet që do të organizojnë evente të mëdha.
“Pas njoftimit të kryeministrit të hënën, 19 korrik, nderi im më detyron të bëj një njoftim vetë,” tha Clapton.
“Unë dua t’u them të gjithëve se kurrë nuk do të luaj në asnjë skenë në prani të një publiku të diskriminuar – theksoi ai. Nëse nuk është e mundur që të gjithë të jenë në gjendje të marrin pjesë në koncert, unë rezervoj të drejtën të anuloj shfaqjen”.
Clapton tha se ai kishte një “përvojë katastrofike” me vaksinën AstraZeneca. Vendimi i tij mund të përfshijë gjithashtu Italinë, ku Clapton do të interpretojë vitin e ardhshëm me ndalesa në Milano dhe Bolonjë, ndërsa ka disa koncerte dhe në Shtetet e Bashkuara duke filluar nga shtatori i ardhshëm.
Artisti britanik merr kështu një pozicion të kundërt me atë të Bruce Springsteen i cili për shfaqjet e tij të radhës në Broadway do të kërkojë një audiencë plotësisht të vaksinuar.
