Nën ritmet e muzikës së fëmijëve dhe Ansamblit të Këngëve dhe Valleve, mbrëmë janë ndezur dritat e festave në Pazarin e Ri. Tashmë e kthyer në një traditë festive, mbrëmë Kryetari i Bashkisë Erion Veliaj ka marrë pjesë në ceremoninë e ndezjes së dritave të pemës së Krishtlindjeve dhe festave që janë këtë muaj.
“Në Bashkinë e Tiranës marrim çdo ditë nga një mijë letra dhe kërkesa, por këtë vit morëm një peticion nga të gjithë kalamajtë e Pazarit të Ri, të cilët thoshin se kemi qejf t’i hapim dritat pak më shpejt. Ca njerëz thanë se nuk ka lezet, koha nuk është ftohur ende, dhjetori s’ka ardhur, por pastaj stafi im më tha: Po ne këto gjëra të bukura i bëjmë për kalamajtë, nëse kanë qejf që t’i ndezim dritat më herët, tek Pazari i Ri do i ndezim më herët. Ndaj, gëzuar festat! Dua që të gjithë të përqafoni dikë që keni pranë, që s’e keni takuar më parë, të jepni nga një përqafim, të tregojmë se Tirana është jo vetëm kryeqyteti i Shqipërisë, por edhe kryeqyteti i dashurisë, mirësjelljes, mirënjohjes dhe i solidaritetit! Faleminderit të gjithëve nga zemra. Gëzuar, mbarësi, shëndet e lumturi të gjithëve!”, tha Veliaj.
Veliaj ka treguar se në ditët në vijim do të ndizen dhe dritat në sheshet kryesore të qytetit, për të krijuar një atmosferë të ngrohtë edhe festive për të gjithë qytetarët.
“Dua shumë që si çdo vit të ndezim dritat në çdo lagje të Tiranës. Do e fillojmë nga Pazari i Ri, më pas do e vazhdojmë në disa sheshe kryesore, sepse duam që festa të mos jetë vetëm në qendër, por në të gjithë territorin e Tiranës. Dua që të gjitha bizneset, ata që mund të rregullojnë vitrinën e tyre, ballkonin e tyre, ata që mund të rregullojnë portën e shtëpisë, hyrjen e pallatit, të gjithë të na japin një dorë, që e gjithë Tirana të jetë një ambient festiv”, theksoi Veliaj.
