Ish-ministri i Jashtëm i Partisë Demokratike Besnik Mustafaj, ka komentuar çështjet më të nxehta të politikës shqipare duke nisur me parapërgatitjet e protestës së 27 janarit dhe disa nga problemet që shqetësojnë më tepër sot kryeministrin Edi Rama.
Sipas Mustafajt, kryeministri i Shqipërisë po përballet me dy probleme të mëdha, ku në njërën anë kërkon të përqendrojë problemet e mëdha në dorën e tij, por më pas ai nuk di të merret me ta.
“Rama ka një përqendrim të madh të pushtetit tek vetja dhe kërkon mirënjohjen nga të tjerët. Ai ka dy probleme të mëdha. E para përqendrimin e problemeve të mëdha tek dora e tij. Aspekti i dytë është se ai nuk i njeh problemet. Qeveritarët tanë mendojnë se ata janë shpëtimtarët e situatës dhe sipas tyre mbreti u qan hallin çdo subjekti të vet”-u shpreh Mustafaj.
I ftuar në rubrikën “Opinion” në News 24, Mistafaj komentoi edhe protestën e opozitës duke larguar zërat pesimistë se kjo protestë mund të largojë edhe më shumë çeljen e negociatave me BE. Për Mustafajn, kjo protestë e opozitës ka një karakter të veçantë, pasi pritet të matet forca e vërtetë e kësaj opozite.
Ai tha se kjo protestë nuk do të bllokojë vendin në aspiratat e anëtarësimit, pasi ajo është e bazuar në rregullat e demokracisë, ndërsa sipas tij, protesta e radhës e opozitës është brenda limiteve demokratike, por si kryefjalë të revoltës ka shprehjen e pakënaqësive ndaj qeverisjes Rama.
“Ka një refuzim të analizës së gjendjes nga ana e Ramës. Ai do të spekulojë me ndjeshmërinë që kanë protestat. Por a mundet që protestat të pengojnë çeljen e negociatave? Un po ju them nëse protestat do jenë në logjikën e demokracisë unë mendoj se nuk e pengojnë çeljen e negociatave. Këto protesta kanë një veçanti, pasi këtë herë kanë një pakënaqësi ndaj qeverisë. Pritet të matet forca e protestuesve të opozitës dhe forca e LSI në protestë, pasi nuk ka protestuar kurrë. Nuk besoj se ato që thotë Basha se pas kësaj ne do çmontojmë qeverinë. Qeveria ka legjitimet të plotë. Protesta do ta thellojë ndjeshmërinë e opinionit publik për kanabisin e vendit”- theksoi Besnik Mustafaj.
