Ish-ministri i PD-së dhe njëherësh shkrimtari, Besnik Mustafaj, thekson se Partia Demokratike ka humbur peshën e saj politike. Kritikat e Berishës në drejtim të kreut aktual demokrat, Lulzim Basha, Mustafaj i cilësoi me vend dhe se lideri historik i së djathtës ka bërë një analizën e duhur ndaj situatës në Partinë Demokratike.
Mustafaj nuk e quan shpërthim ndaj situatës, reagimin e ish-kreut të PD-së ndaj listës së Bashës për zgjedhjet e 25 qershorit, por thotë se ai ka shprehur pakënaqësitë e tij.
“Berisha ishte i pakënaqur me listat, me rezultatet në zgjedhje, me mënyrën sesi janë menaxhuar gjërat, dhe qëndrimin në Parlament, e se fundmi me votimin e Ruçit në Kuvend. Kanë qenë disa momente ku Berisha ka dhënë sinjale se ishte i pakënaqur me atë se çka po ndodh, dhe ishte e pritshme që të bënte një analizë. Pra Berisha bën një analizë të përgjithshme, nuk merret me problemet e partisë. Duhet të them se Berisha nuk thotë publikisht të pavërteta”, u shpreh për “News 24” Mustafaj.
Mustafaj vuri në dukje se baza e Partisë Demokratike është thellësisht e pakënaqur nga Basha, i cili sipas tyre nuk po reflekton lidhur me situatën brenda në parti, por edhe për rezultatet që ajo ka marrë.
Ai shtoi opozita aktuale është në gjendje të dobët dhe e ka të vështirë të luajë rolin e saj.
