Këshilli i Lartë i Prokurorisë do të intervistojë sot kandidatët për Prokuror të Përgjithshëm. Kryeprokurorja aktuale e përkohshme, Arta Marku, ka deklaruar se këto dy vite ka punuar në një terren të vështirë, për shkak edhe të mungesës së hallkave në sistemin e drejtësisë.
Teksa ka bërë një bilanc të punës së saj, ajo ka thënë më tej se gjatë jetës, i është dashur që të merret me shumë çështje. Me fokus të veçantë në luftën kundër korrupsionit.
“Më duhet t’ju prezatoj që puna në Shkodër ka qenë e lartë. Në vitin 2014, kam parë edhe përgëzime për punën atje. Më 2017, unë pata kurajon që të merrja pjesë në garën për kryeprokuror.
Ka qenë një eksperiencë e mirë për mua, ka qenë periudhë jo e lehtë. Ka pasur probleme me drejtësinë. Ka pasur kufizime të karakterit administrativ në sistem. Në sistem mungojnë hallkat.
Puna ime nuk ka qenë e lehtë, kam hasur vështirësi në terren. Gjatë jetës sime jam marrë me shumë çështje. Kryesisht me veprat e korrupsionit. Kam fituar eksperiencë në luftën kundër korrupsionit”, është shprehur Arta Marku.
