Koronavirusi i ka gjetur të papërgatitura shtetet e Evropës, teksa raportohet se në Mbretërinë e Bashkuar respiratorët nuk mjaftojnë për të gjithë.
Sipas mediave vendase, në Londër, trajtim intensiv po i jepet vetëm pacientëve që kanë shanse mbijetese.
Në 24 orët e fundit, në Mbretërinë e Bashkuar u shënuan 209 viktima, duke e çuar numrin total të vdekjeve në 1,228. Ndërkohë më shumë se 19,500 raste infektimi janë regjistruar në vend.
Burime nga NHS thanë për mediat britanike, se makineritë e përdorura për t’i ofruar pacientëve frymëmarrje artificiale janë duke u kufizuar në baza mjekësore.
Sipas tyre, shkak për këtë nuk është mungesa e kapacitetit, por sistemi vendas i shëndetësisë.
“Sa më shumë mësojmë për sëmundjen, aq më të kujdesshëm jemi me trajtimin intensive. Me këtë sëmundje, intubimi mund të kërkojë javë, dhe me një përdorim kaq të gjatë, duhet të kesh bindjen që personi do të bëhet më mirë. Shtyrja e vdekjes së tyre me dy apo tre javë nuk është mirë as për ata vetë, dhe as për shoqërinë”, citohet të kenë thënë të njëjtat burime.
Vdekjet e shënuara në Mbretërinë e Bashkuar nga koronavirusi kanë qenë nga moshat 39 deri në 105 vjeç. Me përjashtim të katër personave, të gjithë viktimat tjera kishin probleme tjera shëndetësore.
