Kandidati i zgjedhur për deputet i Partisë Demokratike në qarkun e Fierit, Enkelejd Alibeaj, ka shpjeguar se përse opozita kërkon përsëritje të zgjedhjeve në 9 qarqe të vendit.
I ftuar në emisionin “Open” Alibeaj u shpreh se tek votat e shpallura të pavlefshme “flenë” thuajse 8 mandate deputetësh, që mund të ndryshojnë rezultatin e zgjedhjeve parlamentare.
Enkelejd Alibeaj: “Me 83 mijë fletë votimi të pavlefshme, kemi së paku 8 mandate deputetësh që nuk i përgjigjen realitetit. Por pse ne po kërkojmë përsëritje zgjedhjesh në këto 9 qarqe? Sepse në nenin 160 përcaktohet se “ke të drejtën të kërkosh paligjshmëri dhe përsëritje të zgjedhjeve kur masa e pavlefshmërisë e përkthyer në shifra, ndryshon rezultatin e zgjedhjeve. Ka pasur shkelje në Kukës, Lezhë apo Dibër, por s’na ndryshon rezultati”.
Partia Demokratike ka dorëzuar dje në KAS dosjet voluminoze me ankesat për parregullsi në procesin zgjedhor të 25 prillit në 9 qarqe.
