Mbrëmë në “Opinion”, gazetari Artan Hoxha ka rrëfyer një histori të së shkuarës, e cila lidhet ngushtësisht me Greqinë. Emigracioni i ka lënë një shije të hidhur. Ai ka treguar pa “doreza” se kur e kishte kapur policia greke, nuk mund të flitej për të Drejta të Njeriut, por për një dhunë barbare, larg një vendi të civilizuar.
Atë e kishin dërguar në një postë policie, dhe dhuna dukej se ishte e pashmangshme. Policët grekë nuk përdornin shkopinj gome, por druri. Teksa rrëfente këtë histori të dhimbshme, gazetari Artan Hoxha tha se kishte parë njerëz që iu ishin thyer duart, dhe shumë të tjerë që kishin fraktura në trup nga dhuna e policisë greke.
“Sa herë që shkonim atje, na thonin ikni që t’iu mbajë Berisha në Shqipëri. Pasi ai ka qenë president në atë periudhë. Mua më goditën nga fytyra, dhe për faktin që mu përhap gjaku në fytyrë, dukesha shumë i dëmtuar. Dhe ajo më ndihmoi, sepse i shpëtova drurit tjetër.
Kemi qëndruar në bodrumet e stacionit policor, deri në momentin sa u bë numri i duhur për t’u nisur drejt Shqipërisë. Na kanë mbajtur edhe me pranga”, përfundoi ai.
