Ai është heroi i “Tripletës” së famshme të Interit në 2010 dhe tashmë rikthehet të flasë për marrëdhëniet me numrin një të pankinës, Jose Mourinho. Portieri brazilian, Julio Cesar që aktualisht është pjesë e Flamengos në një intervistë për “Seleção Sportv” tregon disa nga momentet pikante me “Special One”.
Mourinho është një “trajner shumë kërkues” nga lojtarët që ka në ekip dhe kërkon që të marrë nga ata gjithmonë maksimumin. “Kujtoj që vitin e parë nën drejtimin e tij ishte një sezon i madh, ndërsa në të dytin u komplikuan gjërat. Një ditë, në një seancë stërvitore, pas një gabimi, Mourinho m’u afrua dhe më tha: Ti je portieri më i mirë, por sot jeni shfaqur si një portier i Seria C”.
Mjaft interesant është edhe një mesazh pasi Brazili fitoi Kupën e Konfederatave në vitin 2013. Brazili po mbizotëronte 3-0 ndaj Spanjës, në “Maracana”, dhe Julio César u zgjodh si portieri më i mirë i turneut. Braziliani mori çmimin dhe fanellën e Casillas, si një haraç për gjithçka bëri. “Kur shkova në dhomën e zhveshjes pashë një mesazh nga Mourinho, që e kishte nisur në telefonin tim.
Në mesazh lexohej: “Ti je i çmendur. Eshtë Casillas, ai që do të duhej të merrte fanellën tuaj dhe e kundërta. Mourinho më thoshte edhe se unë, me një dorë të vetme, prisja më shumë se Casillas”.
Pas finales, Casillas shkoi në dhomat e zhveshjes së Brazilit për ta falënderuar Julio César për gjestin. “Iker erdhi në dhomën tonë të zhveshjes për të biseduar me mua dhe i thashë se duhej të përballej me Murinhon, një person i vështirë, por të cilin duhej ta përballonte. Mourinhos i pëlqen gjithmonë të përplaset me lojtarët, që cilësohen si yjet e ekipeve, të cilat ai i drejton”, – ka thënë Julio Cesar.
