Për Jose Mourinho problemet me ligjin nuk kanë të mbaruar. Ai është paraqitur sërish para gjykatës në Spanjë dhe ka rënë dakord që të paguaj një gjobë për shmangien e taksave që kishte bërë gjatë kohës që ishte në pankinën e Real Madridit. U duk se kjo çështje u mbyll dy vite më parë kur Mourinho pranoi fajin dhe u detyrua të paguante një shumë të majme në shtetin spanjoll, pasi kishte kryer evazion fiskal dhe për ti shpëtuar burgut ai pagoi të gjitha gjobat e kamatat.
Por prokuroria e ka hapur sërish këtë çështje, pasi janë zbuluar fakte të reja shkeljeje dhe ka thirrur sërish numrin një të Manchester United në gjyq. Trajneri ka pranuar fajin në seancën e fundit gjyqësore dhe ka gjetur një akord verbal me zyrën e taksave në Spanjë, për të paguar një gjobë prej 800 mijë eurosh në mënyrë që të shmangte dënimin me burg, pasi shkeljet e tij ishin të dukshme. Marrëveshja në fjalë është shfaqur para gjykatës që po merrej me çështjen dhe pritet të nënshkruhet nga palët në javët në vijim.
Zyra e krimit ekonomik kishte akuzuar Murinhon se kishte bërë mashtrim duke mos deklaruar të ardhurat për një shifër prej 3,3 milionë eurosh gjatë periudhës kur ai ishte trajneri i Real Madrid, në vitet 2011 dhe 2012. Murinho kishte përdorur që nga viti 2004 një sërë kompanish në parajsat fiskale të cilat kishin qarkulluar mes tyre kontratat e të ardhurave nga e drejta e imazhit të trajnerit, duke mos deklaruar shifrat reale, për të kursye në pagesën e taksave.
Murinho deklaroi fillimisht se ishte i pafajshëm, siç dëshmoi para gjykatës në nëntorin e vitit të kaluar. Por tanimë është e qartë se trajneri ka pranuar fajin dhe i ka dhënë fund kësaj çështje duke paguar gjobën për të mbyllur sa më parë këtë temë.
