Mëngjesin e sotëm, është ndarë nga jeta anëtarja e LSI-së dhe ish-kryetarja e njësisë bashkiake nr. 6 në Kombinat, Luzhiana Abazi.
Si pasojë e një sëmundjeje të rëndë, Abazi, e cila ishte një nga themelueset e Lëvizjes Socialiste për Integrim, ka ndërruar jetë në mënyrë të parakohshme në moshën 47-vjeçare.
Dhembjen për vdekjen e saj e ka shprehur në rrjetet sociale kryetarja e LSI-së, Monika Kryemadhi, e cila ka qenë dhe mikeshë e së ndjerës.
“Nuk mund të shkruaj, ka orë që mundohem por është vështirë. Luzhi u largua fizikisht sot nga ne, duke na lënë një dhimbje dhe boshllëk të pazëvendueshëm. Energjia dhe dashuria që ajo na dhuronte pa kushte do të na mungojë gjithmonë. Ndoshta sëmundja e rëndë ja doli të të mundë përkohësisht, por ti do jesh engjëlli që do na shohësh e do kujdesesh për ne, siç ke bërë gjithmonë. E dashur motra ime, mikeshë e zemrës dhe e betejave tona, do të jesh gjithmonë pjesë e imja, në ditë të vështira dhe të mira. Sepse askush nuk mund ta zëvendësojë forcën dhe kurajon që vëtem ti dije të na jepje si askush”, -ka shkruar në Facebook Kryemadhi.
