Moti i keq ka përfshirë veriun dhe jugun e vendit, duke sjellë problematika në qarkullim në disa zona.
Reshjet e shumta të dëborës kanë bllokuar Llogaranë, duke e bërë atë të pakalueshme mbrëmjen e së hënës, ndërsa e njëjta situatë ka vazhduar edhe gjatë mëngjesit.
Punonjësit e Autoritetit Rrugor Shqiptar dhe kompanisë së mirëmbajtjes ndërhynë menjëherë duke garantuar zhbllokimin e aksit. Kalimi aktualisht vazhdon normalisht, ndërsa është me rëndësi lëvizja e kujdesshme e mjeteve dhe përdorimi i zinxhirëve.
Reshjet e borës kanë rënë edhe në juglindje, teksa në rrugët Qafë Thanë-Pogradec dhe Korçë-Dardhë, dëbora ka arritur mbi 15 cm, megjithatë për momentin nuk janë akse të bllokuara.
Probleme ka edhe në disa akse në veri të vendit. Konkretisht, zona e Thethit mbetet e bllokuar, ndërsa në Dibër disa rrugë kanë zënë shtresa akulli dhe kalimi bëhet me zinxhirë.
Edhe fshati Qarrishtë në Librazhd raportohet të jetë i bllokuar nga dëbora.
