Situata në kampin e Manchester United pas humbjes 3-1 ndaj West Ham duket është përshkallëzuar më tepër. Konflikti është ai i vjetëri mes Jose Mourinhos dhe Paul Pogba, francezi u zëvendësua në minutën e 66’-të dhe duket se tashmë ka vendosur që të mos luaj për asnjë minutë për Manchester United, të paktën për aq kohë sa në stol është trajneri portugez.
E përditshmja “Mirror” i referohet burimeve brenda skuadrës së United, ku Pogba u ka thënë shokëve të ekipit se do të vazhdojë betejën që ka me trajnerin portugez, duke refuzuar që të luajë për Mourinho edhe sikur kjo situatë të zgjasë për shumë kohë.
Këtë javë, trajneri Mourinho mori vendimin për t’i hequr mesfushorit kampion bote të drejtën që të jetë kapiteni apo zv.kapiteni i skuadrës, ndërsa në humbjen 3-1 ndaj West Ham, Pogba u zëvendësua në mesin e pjesës së dytë.
Polemikat mes trajnerit dhe lojtarit kampion bote me Francën kanë kohë që kanë nisur, por tashmë ato pritet të kalojnë në një stad tjetër, me Pogba që është gati të qëndrojë në stol apo tribunë dhe të refuzojë të luajë për Mourinho.
