Presidenti amerikan, Donald Trump kritikoi ashpër Evropën për shpenzimet e mbrojtjes dhe për suficitin tregtar mbi Shtetet e Bashkuara. Trump bëri kritika sapo u kthye në Uashington. Presidenti ishte në vizitë zyrtare në Paris për 100 vjetorin e fundit të Luftës së Parë Botërore.
Trump shkruan në Twitter se “ishte arritur shumë” në takimet e tij me udhëheqësit e tjerë botërorë. Por ai tha se nuk ishte “asnjëherë e lehtë të hapej tema se Shtetet e Bashkuara duhet të trajtohen me drejtësi, gjë që nuk është bërë, si nga ana ushtarake, ashtu edhe tregtare”.
Udhëheqësi amerikan deklaron “ne paguajmë shuma të mëdha për mbrojtjen ushtarake të vendeve të tjera, qindra miliarda dollarë, për privilegjin e madh të humbjes së qindra miliarda dollarëve me të njëjtat vende në tregti”.
Trump shtoi se u kishte thënë udhëheqësve “kjo gjendje nuk mund të vazhdojë, është dhe gjithmonë kaq qenë e padrejtë ndaj Shteteve të Bashkuara. Sasi të mëdha parash të shpenzuara për mbrojtjen e vendeve të tjera dhe ne nuk marrim në këmbim asgjë tjetër veçse defiçite tregtare dhe humbje. Ka ardhur koha që këto vende shumë të pasura, ose të paguajnë Shtetet e Bashkuara për mbrojtjen ushtarake që ajo siguron, ose të mbrojnë vetveten … dhe tregtia duhet të jetë E LIRË dhe E DREJTË!”
Presidenti Trump e ka deklaruar veten “nacionalist” me një botëkuptim ku Amerika vjen e para, në marrëdhëniet ndërkombëtare. Por të dielën në Paris, në ceremonitë me rastin e 100 vjetorit të Luftës së Parë Botërore. Presidenti francez Emmanuel Macron, ndërsa zoti Trump dëgjonte pranë tij, e denoncoi nacionalizmin në rritje në gjithë botën, duke e quajtur atë “një tradhti ndaj patriotizmit”.
Që kur u bë president para dy vjetësh, zoti Trump është ankuar vazhdimisht se shumë aleatë evropianë nuk e kanë plotësuar objektivin e NATO-s që deri në vitin 2024, të shpenzojnë dy për qind të ekonomive të tyre kombëtare për mbrojtjen, kryesisht për armë dhe forcat e armatosura./VOA/
