Studentët kanë shfaqur rezistencë gjatë tetë ditëve, e ndërsa sot ata vijojnë të palëkundur në bindjet e tyre. Por pavarësisht tentativave të dështuara të kryeministrit Rama, ai vijon ende tu shtrijë dorën, me bindjen se dialogu do të jetë rrugëzgjidhja e këtij kaosi që po vijon në ditën e nëntë të saj.
Por studentët nuk kanë ndërmend që të ulen në një tryezë me të, e kjo reflektohet qartë edhe në një video që ka shpërndarë vetë Rama në Instagram. Një person me megafon u ka kërkuar studentëve që të mos pranojnë dialog me kryeministrin. Kjo i ka bërë përshtypje vetë Ramës, i cili edhe ironizon.
“Më kollaj e besoja që fluturon gomari, se sa që këto imazhe, s’janë arkiva filmash të gjyqeve komuniste kundër armikut të klasës! Po jo, janë të freskëta fare mu nga mbrëmja e sotme në Fakultetin Ekonomik.
Dhe kaq shumë jam tronditur, sa që më bëjnë sytë sikur oratori është Sherifi, një enverist që në fundvitet ’90 drejtonte Komitetin Kombëtar të Turizmit si socialist dhe porosiste hotel-turizmat ta merrnin djathin tek i vëllai në Përmet.
Po as vetë ai, i shkreti Shero që kishte zbuluar efiçencën e kalit në ekonomi në një studim doktorature, s’do ishte dot kaq fantazmë e të shkuarës sa ky oratori këtu. Të cilin nuk e njoh, po Zoti i ruajt studentët tanë nga të tilla fantazma që u tregojnë se ç’duhet të bëjnë me jetën e tyre”, shkruan ai, bashkëngjitur videos në fjalë.
