BE ka paralajmëruar Mbretërinë e Bashkuar se do të ketë veprime ligjore nëse ndryshohen pikat kyçe të marrëveshjes për Brexit, apo largimit të Britanisë nga blloku evropian.
Sipas BE-së, ndryshimet dëmtojnë seriozisht besimin në mes të BE-së dhe Mbretërisë së Bashkuar.
Qeveria britanike ka thënë se parlamenti i saj është sovran dhe mund të miratojë ligje që shkelin detyrimet e traktateve të Britanisë.
Shqetësuese për BE-në mbetet propozimi i kryeministrit Johnson, i ashtuquajtur Projektligji për Treg të Brendshëm, që u publikua ditën e mërkurë.
Aty përmendet Protokolli për Irlandën Veriore, element i marrëveshjes për largim nga BE-ja që synon të parandalojë një kufi të ashpër në këtë zonë. Projektligji i ri propozon që të mos ketë kontrolle të mallrave që kalojnë nga Irlanda Veriore në Britani të Madhe.
Dokumenti në fjalë u ofron mundësi ministrave britanikë që të ndryshojnë rregullat që lidhen me transport të mallrave nga 1 janari, nëse Britania dhe BE-ja nuk arrijnë marrëveshje për tregti.
