Pak ditë më parë, trupi i pajetë i 32-vjeçarit Endri Mustafa u gjet në zonën e Livadheve, në lagjen Guerile në Shkodër. Mustafa kishte dalë nga shtëpia, pas një mesazhi që kishte marrë në telefon.
Dëshmia e 15-vjeçarit, Ergys Malja, i cili dyshohet se në bashkëpunim me Ibrahim Licin kanë vrarë me armë zjarri Endri Mustafan në lagjen Guerrile, kanë zbardhur ngjarjen e rëndë.
I mituri, fqinj me viktimën, u arrestua si bashkëpunëtor në vrasje. Ai ka akuzuar Ibrahim Licin si autor, duke treguar dhe bisedën e fundit mes tij dhe viktimës. Zona e Livadhes ku është gjetur i vrarë Mustafa është problematike për ngjarje kriminale, si dhe për djegie makinash nga autorë vrasjesh.
“Biseduam me Endrin për t’i shitur një qengj. Rreth orës 18:00 i çova qengjin Endrit. Me Endrin kam bërë muhabet hashashi. I thashë Endrit se kisha mbjellë hashash. Hashashin e kisha mbjellë në zonën e Livadheve.
Më tha ‘do të ndihmoj të çosh kanabisin në shtëpi’. Pas kësaj rreth orës 22:00 u nisëm drejt Livadheve. Ibrahim Lici na doli përpara, kishte armë. Lici doli në vendin e quajtur gropa e eskavatorit.
Lici kishte armë në dorë, qëlloi Endri Mustafën. Endri i tha ‘mos me vrit pash Zotin, se kam fëmijë’. Ibrahim Lici e qëlloi përsëri, madje dhe në fytyrë.
Ibrahim Lici i tha Endrit ‘qofsh i xhenetit’ dhe u largua me motor nga vendngjarja”, ka qenë deklarata tronditëse e tij.
Dëshmia e bashkëshortes së të ndjerit
Dy ditë më parë, bashkëshortja e 32-vjeçarit Endri Mustafa, doli për mediat lidhur me ngjarjen kriminale.
Ingrid Mustafa është shprehur se familja e saj nuk ka pasur kurrë probleme me familjen Lici, duke hedhur poshtë dyshimet se autori kryesor i vrasjes është Ibrahim Lici, i cili është shpallur në kërkim nga policia. Ajo zbuloi edhe bisedën e fundit me burrin e saj, para se të largohej nga shtëpia për të mos u kthyer më kurrë.
“Nuk kemi patur kurrë asnjë problem me familjen Lici. Burri im ka qenë shok me djemte e tij. Unë e kam thënë edhe ne polici se Ibrahim Lici nuk ka lidhje me vrasjen, dhe habitem si e kanë nxjerrë, sepse nuk ka asnjë lidhje dhe jemi 100% të sigurtë se nuk ka ndodhur nga Ibrahimi. I kemi komshi dhe nuk kemi patur kurrë asnjë problem me ata”. /TIRANA TODAY
